مافيش حاجه
عادى
حرّ و خنقه و الجو مولّع
إيه يعنى ؟؟!!
أدينا عايشين برده
كل يوم بتكتشف حدّ جديد مايستاهلش إنك كنت تعرفه ؟؟
عادى
و لا كأن فيه حاجه
مدّايق من شوية عكننه فى الشغل و مش عارف إن كنت إنت اللى صح و اللا اللى حواليك ؟؟!!
عادى
بتصبر و تعدّى و مبتسم على طول و بتحاول تنفذّ كل اللى اتعلمته عن الإتيكيت و الأدب و الذوق و جاى على نفسك لدرجة بتبقى قرفان تبصلك فى المرايه لأنك حاسس إنك منافق و انت بتعمل كل دا؟
عادى
و يوم ما تيجى تبعبر بس عن رأيك مرّه أو تحب توقّف حد عن حدوده اللى هى أصلاً خدت ف وشها تلاتربع حدودك إنت شخصياً و بقى البارد اللى عايز توقفه واقف فى الدايره بتاعتك إنت شخصياً يتقالك عيب و تتخاصم و تطلع إنت الـ Villain بتاع الفيلم كله ؟
عادى
و غير كده و كده حاجات تخنق و تفقع المراره ؟؟ عادى جدا جدا جدا
و لا حاجه من كل دا تلفت نظر أى حد لما تبقى عندك…
صحيح لو كانت عنده هايقوّم الدنيا .. بس الدنيا هاتقعد تانى 
عادى جداً برده
