صور شقيه
المره دى من غير “هو”….. الموجود المره دى صور ليها “هى”
اقرا وجرّب …. يمكن تعجب…. يمكن توصل منها الغيّه
وياللا……….
صوره (1)
بجنيه يا بيه………… بجنيه يا أبله…… أيوه يا هانم…….. اتفضلى…… بجنيه……. كل حاجه هنا بجنيه…… اتفرجى…. خد فكره…. وبلاش تشترى خالص…. إيه رأيك؟
بجنيه..؟؟…… يعنى المقصّ دا بجنيه؟…………
كل حاجه بجنيه وأى حاجه هنا بجنيه يا أبله؟؟؟؟ شوفى اللى يعجبك…. اتفضلى …. خدى فكره……
” و الله حاجات حلوه يا سها… ما تيجى نشوف………
ويقفوا مريم وسها يشوفوا و يتفرجوا على البضاعه …. و حاجه تجرّ حاجه…. دا مقصّ … ودى ليفة مواعين… ودى بِنًسْ.(البنات بيحطوها ف شعرهنّ و لهٌنّ فيها مآرب أخرى ) ….. و دى محفظه …. و أهو… كل حاجه بجنيـــــــــــــــــــه……… مش كتير يعنى…… كلام فاضى…
ها…. شوف كده بقى……… حسابنا كام؟
نعِدّ يا أبله… و اضربى ف جنيه…. الله واحد ….. مالوش تانى ….. تلاته…..أربعه…………………
خمسه وتلاتين…. يبقوا 35 جنيه يا أبله بالصلاه على النبى
يااه ….هههههههههههههه دا الواحد ممكن يشيل الحاجه كلها من غير ما يحسّ…. و كل حاجه لوحدها بجنيه…. والحسّابه بتحسب على رأى عادل إمام…..ههههههههههههههههه
تعيشى و تجيبى يا أبله……
وانت تعيش يا اخويا….. اتفضل……
